當日，ROVER 四人身穿全黑dresscode，打扮成熟又有型。怎料，他們一開口就搞gag，互相開玩笑。
講起三位隊友，亨仔說道。「好彩大家都「甩」凸咁樣磨合，即係一個「甩」一個凸…」話未完，希晉和隊長Kim隨即笑着糾正：「係「凹」啊，「凹」！」
訪問室裏，隱約瀰漫着孩子氣。這種介乎成熟與不成熟之間的狀態，又被稱「初級大人」。
對此，出身《全民造星V》的ROVER 四子一手包辦作曲、編曲和監製，製作《初級大人》一曲。四人一起寫曲，不會吵架嗎？希晉答覆：「始終有四個腦係難啲，但幾有挑戰性，幾好玩。」ROVER 四人都是主唱，對vocal 有一定的執着，隊長Kim 提起「有拗verse 嘅唱法」，直言不喜歡隊友認為較好的版本，但最後還是堅持己見。「寫歌我哋會嗌霎多啲，加咩樂器、或者個melody點行…. 」鼓手Jason 和希晉立刻笑着修正：「係激烈討論。」「唔係嗌霎，係激烈討論。」
Jason 同是澳門樂隊石裂符的鼓手，作為「孖band界權威」，他感慨道：「每隊band都一定講過要散band，夾band真係好難。」但重要的，是「大家肯唔肯講最真個樣嘢」。四人大部分時間都「唔係講緊認真嘢」，但有時會突然認真起來，坦誠溝通。
Kim 坦言，自己入隊前並不擅長溝通。「未玩造星、未入ROVER之前，我係一個唔講嘢同好摺嘅人。」不過，比賽要與人溝通，夾band更要與隊友緊密溝通，自己「個vibe唔可以太摺」，所以他性格改變不少。希晉比喻夾band又如拍拖一樣：「溝通好重要，如果屈喺個心度唔講出嚟，越積越多會爆發。我哋好信任大家，會講心底話，鬧吓鬧吓先親密㗎嘛。不過依家好少拗㗎喇…」「呢排個零月先見一次。見少咗，發現親密咗，呢排我哋關係好好。」亨仔說。希晉補充：「依家係老夫老妻咁樣。」
繼《男孩子不要流淚》及《流浪者詩歌》後，小克三度與ROVER合作，為《初級大人》填詞。陪伴ROVER 從「男孩子」長大成「初級大人」，小克在了解成員親身經歷的遺憾後，寫出這份動容的歌詞。
夜深想起 我深愛的貓
在生當天 依偎我睡覺
孩子一般 哭泣太丟臉
為何還終日掛念
懊悔愛牠未夠 有種虧欠
Verse 1的靈感來自Kim的愛貓德德 —— Kim 的遺憾，是未能見到德德的最後一面。
不過，見到愛寵最後一面的結他手亨仔，亦有種遺憾。「養咗隻狗17年，臨尾佢走嗰下，都慶幸係同佢一齊。讀書時期好多時都陪唔到佢，遺憾自己冇時間陪佢終老。時間過咗就係過咗，追唔返。」
沒有養過寵物的鼓手Jason，又有另一種的遺憾。「一直好想養寵物，但由細到大都無養過。有晚，聽到停車場有隻狗仔係咁汪汪叫，我好想落去執佢上嚟養，但屋企人唔俾。我喊咗成晚，呢個係小時候嘅遺憾。」
面對遺憾，又該如何釋懷？Kim說：「其實冇，諗去點樣消化，反而更加消化唔到。夾硬要忘記，基本上冇可能，時間永遠沖淡一切，所以由佢啦。」天性樂觀的希晉，又認為遺憾是成長的經驗值：「樂觀面對，可能有意想不到嘅效果。人總喺低谷嘅時候先最了解自己，試吓同自己對話，藉箸唔同遺憾令自己成長，其實都係一件好事。」
但這種遺憾也許 圍著我開出花朵
讓痛苦 可轉化出養分 埋在土裡
誰的貓 優雅地踏過
歌詞中「誰的貓優雅地踏過」一句，ROVER起初看不太懂。於是，填詞人小克特別錄了長達8分鐘的音訊解釋。希晉嘗試複述：「首歌上半係圍住Kim嘅故事嚟講，下半開始講人生、父母、愛情。到chorus係首尾呼應，踏過嗰個係咪啲骨..骨..骨灰啊…？」希晉緩緩轉頭，求救的眼神撇向Kim，示意他幫忙接力解釋。Kim續說：「唔係，貓貓過咗身，埋喺土裡面，變做養分。 第二隻貓踏過泥土嘅時候，就可以吸收返嗰隻貓嘅養分，帶住佢嘅理念再行一段路。」希晉聽畢點頭，笑說：「吖好似係啊，大約係咁囉。」
用遺憾施肥，我們踩著富饒土壤，走過後又是一條好漢。
不甘安穩 以自由步韻（此生不要白過）
向理想衝 叫父母擔心（如同罪過）
多番掙扎與進退 道別愛侶
壯志已陪同靈魂 遺落在馬路人堆
過濾 理想中的污水
ROVER 成團後，四個音樂夢又圓了點。希晉說：「如果無Rover嘅話，我依家可能仲渾渾噩噩咁做緊Sales。」隊長Kim小聲地回答：「依家喺ROVER都係渾渾噩噩。」
「喂喂喂！」Jason 拍了Kim 一下。「講笑咋！」Kim 答。
Jason 認為加入ROVER又如為人生選了「困難模式」；希晉附和，覺得是「地獄級」的困難。Jason 接著說：「我哋係一條team，要合作去做唔同方向嘅作品，呢樣嘢齋諗已經好難。第二，係點樣實行。最尾，最難嘅係觀眾點樣睇。作品好需要觀眾支持 —— 歌又好、片又好、出show都好，全部加埋就係「難上加難上加難」。」
樂與苦 一生中 循 環 穿 梭
到底這個我 大了幾多
或最終發覺 從沒大個 初級的我
訪問尾聲，被問及「會唔會想升級做高級大人」，當日寡言的亨仔難得率先回答：「好希望進化成終極大人，可以有經濟能力養爸爸媽媽。現今香港社會，（決定你係）邊個階層嘅大人，係睇戶口積蓄有幾多㗎啫，高級大人唔易做。最想爸爸媽媽可以退休，佢哋60歲喇，又呢度痛嗰度痛。」
想起上星期，偶然在Threads 看到ROVER 隊長Kim 一篇留言回覆。帖文提到ROVER 成員身兼多職，如「Kim 開班教樂器」、「希晉開班教唱歌」及「亨仔去反（返）地盤）」等，並附上亨仔所發佈，在地盤工作的限時動態截圖。
Kim 留言回覆：「生活從來都唔容易，用自己雙手撐起夢想同生活，沒甚麼好丟臉。入得舞台就入得地盤返工，先至係真正嘅能屈能伸。」Jason 更逗趣地回應Kim：「做訪問唔見你咁識講嘢。」
活滿18年就要換成人身份證，沒有誰準備好才變大人。努力過活，拼命便無恙。不需強迫自己成熟，一片稚氣中，願意努力邁步經已很好。
必要時，或如希晉所言，保持一點天真，做個初級大人也不錯。
分號 INTERLUDE HK 2026
分號 INTERLUDE HK 
發佈留言