【分號專訪】「真作假時假亦真」介乎真假與幽默之間的情感｜專訪《UFO離奇命案》導演兼編劇李振傑 x 演員黃德斌

79年前的盛夏七月，美國羅茲威爾發現神秘墜毀的殘骸，傳聞涉及外星事件。當然，外星人式都市傳說無從得知真偽，但亦造就無限遐想。《UFO離奇命案》始於25年前，一個小學生於東頭山失蹤，兩位同行小學生直指其被外星人帶走；25年後的同一日，兩位目擊者重返現場，面對未知的潛在外星生物，有人選擇以演技，以勒索，以一生之承諾介入此「外星人帶走事件」。

「假作真時真亦假」出自《紅樓夢》，意指若把虛假事當真，真的事物反而會顯得不實。不過若將此反轉，「真實」呈現的基調是虛幻，「真作假時」又還剩下什麼呢？

「當然我哋身為創作人，我哋可以喺電影裡面，告訴你真相係咩…不過如果件事真係比你find out咩係真，咩係假，件事發生咗對世界又有咩影響呢？可以係無影響嘅，」

「但對主角嚟講嘅影響，又係咩呢？」

好兄弟的支持

電影由出品人Eddie斥資，故事以外星人作為牽引，凌文龍、陳湛文、林子傑三子面對未知下，交織出驚悚與黑色幽默。「喺寫三兄弟嘅兄弟情，寫寫吓又突然之間，好似感受到我，CK（郭家禧）同Eddie嘅感覺。」導演兼編劇李振傑（Jack）與Eddie結識於中學開學第一天，到中四時連同同為導演兼編劇的CK共讀理科班，因對足球與籃球的共同興趣而成朋友。

Jack與CK中學畢業後修讀電影，走上從商之路的Eddie，不時聽他們談論娛樂圈的血淚史 —— 題材好但途中出問題，又或是成品好但票房未如理想。「突然間（Eddie與生意上的朋友）諗，假如生意做得咁上下有資金，不如搞一套電影，可以唔理其他人，專心拍一套我哋創作者覺得應該係啱數嘅戲。」及後Eddie生意上軌道後，斥資300萬支持Jack與CK拍攝本片。話雖低成本，不過導演在「老闆交低錢就無過問」的信任下獲極大創作自主。

「今次嘅資金，唔係政府畀，唔係一個電影大亨畀，係一個我哋認識咗好多年嘅好朋友，好兄弟去畀錢嘅。」抱著不希望好兄弟蝕錢，起碼打個和的推動力，導演組主要從觀眾角度考量，在選取題材時認為題材不宜過於文藝或過於寫實：「好似商業（片）比較著數，喺低成本裡面唔使開槍，唔使打交，唔使爆炸嘅，不如就搏下喜劇。」

「唔想好搞笑」之下摸索笑片的節奏

「由於我哋一開始，係好唔想將呢套戲變成好搞笑，所以就唔知點解拍咗一種好吊詭嘅搞笑感。」Jack出身於副導演，參與過數套喜劇，曾遇上好笑劇本，效果卻不幽默的情況，亦有見過不好笑的劇本被演到活龍活現。

「其實我唔敢掂喜劇，因為我無咩信心，可以拍到令觀眾大笑嘅一啲idea出嚟。」基於對笑片節奏的摸索，Jack在創作時卻反其道而行：「我哋唔係想寫一套令人笑嘅喜劇，只不過我哋寫一個荒誕嘅情況，令觀眾覺得點解會搞到咁，而造成嘅失笑。」電影中的好笑位，不乏在不適當時候出現的突兀對白，Jack形容笑位只是「笑一下」，即使觀眾未能意會亦不會尷尬，隨即進入下一幕。

因此在拍攝期間，導演組亦不斷提醒演員「唔好搞笑咁演戲」「真係唔好咁搞笑」，皆因電影中的幽默源自章回式的離奇與古怪，而非靠搞笑的演繹。如其中一幕，出現錯手將物件扔中演員私人部位，效果雖搞笑卻有另外考量：「呢個shot好搞笑，但係諗諗下，如果我哋第一個chapter就用呢個shot好似over咗。」為求「唔好咁搞笑」，導演組選擇先以拍攝背影，及後章節再見正面，透過資訊落差拿捏節奏。

觀乎外界高度讚賞電影爆笑風趣，不過Jack笑言有另類焦慮：「依家出面嘅觀眾話我哋係爆笑喜劇，唔係咁架唔好啊。」由詭異風趣到被評為爆笑喜劇，Jack指創作人亦需適時放開，最重要是能娛樂觀眾。

簡單，直接

那麼要如何避免出現「笑片唔好笑的尷尬」？演員之一的黃德斌直言根本無法計算，只能待上映後由觀眾判斷：「（咩叫好笑）真係無一個答案…我自己無一個特定諗法「喜劇就要係咁。」」不過在劇本所營造的吊詭氣氛下，Jack指觀眾在Kenny登場時已感有趣：「佢唔使搞笑，觀眾話已經覺得好好笑，見佢嘟起塊面。」之所以如此，Kenny解釋：「我諗人物（設定）嘅前提，令到觀眾有咁嘅睇法。」Kenny所飾演的星辰大師有著嚴肅學者的形象，起初服飾形象更是「太過有型，服裝太多顏色」，在「姿整化」下連同開工首天所選的眼鏡，方營造現時的學者形象。

若談Kenny的喜劇演出，定必提及與導演CK合作的電視劇《大叔的愛》，Kenny指喜劇亦有幾類，如浮誇式小丑式，或是處境式，不過演繹上的張弛亦需靠導演共同判斷：「例如大叔的愛（同《UFO離奇命案》）其實都係處境，不過可能演繹嘅方式多少少。但多少少或者少少少嘅時候，係邊一個位置，就係人事。」Kenny形容今次角色較《大叔的愛》浮誇感較少，但演出形象嚴肅的星辰大師時，亦有陳湛文、凌文龍等人在旁古靈精怪，忍笑的考驗亦成拍攝時好玩之處。

創作世界中的外星世界

不過笑片歸笑片，為何是以外星人作基調呢？從另一導演CK眼中，低成本電影中要有一個爆點作賣點，不過他本來對外星UFO興趣不大。反而Jack則為此類型傳說的著迷者：「我好希望自己可以親眼見到UFO，咁我覺得自己身為一個創作人，好多嘢就係唔好定界自己，唔好規範自己，點解呢個世界唔可以有UFO呢？」從90年代流行的『解剖外星人』事件，甚至1999年世界末日傳說，傳聞恐怖大王將從天而降，亦是Jack感興趣的題材，因此這類彩蛋亦隱藏於電影角落。

「不過就成日都有一個疑問，點解UFO一定侵略，一定會殺傷呢？」有如80年代《異形》，外星人亦以戰鬥格現身，亦造就Kenny的一個疑問：「既然外星人咁高科技，就好似我哋喺砌模型都得嘅，點解一定要侵略我哋呢。」

外星人的未知造就創作的遐想，不過Jack直言自己亦盼能遇UFO以激發創作，原因在於聽聞過一些平凡人，見到UFO後有全新想法的故事。「我聽過有接觸過啊，即係你都唔知信唔信好。」Kenny直言聞說過朋友相關經歷，但兩人也指即使在場見到亦可不信，「影嚟㗎啫，衛星嚟啫。」

如何收尾，談電影的韻味

故事「起承轉」後，電影固然有「合」的部份，不過無論是外星小灰人，電台或網紅所講的流量，內容的真假視乎不是收尾的重點。「我可以喺度講真相俾你聽…但你聽完我嘅真相，都會覺得『好啦唔錄音唔拍片，講啦，真相係咩呢』，就睇你信唔信。」

既然真相不是重點，那要如何收尾呢？「喜劇又得，愛情片又得，最後要有嘅嗰個收尾，要有一個觸動，寫一啲人情細故喺裡面。」做法有如日式推理電影，一輪調查與錯愕歸於人情味。說法看似老生常談，但Jack認為現時盛行的短劇與網絡短片，卻少了一點觸動：「如果大家搵嘢睇，我覺得係抓一啲情感上嘅嘢，真係唔好話好快要有一個twist，因為無twist就唔吸引。」

「雖然都係講速食文化，講流量嘅一個故事，但係我覺得最後係人與人之間嘅關係，情感。如果呢個故事係觸動到大家，係我最希望嘅。」

「喺寫（結尾）三兄弟嘅兄弟情，寫寫下又突然之間，好似感受到我，CK（郭家禧）同Eddie嘅感覺。如果我將呢件事帶返去電影收尾，嗰件事好似就好圓滿。」