「最主要係做一個可以打動到人（嘅歌手）。但係打動唔到人，打橫都得。」當Gigi 被問及未來想成為一個怎樣的歌手，她思索片刻，冷不防地拋了個食字gag。在場所有人都被逗笑，訪問者更一度笑得舌頭打結。
「呢個（gag）都好似都ok喎，雖然有啲凍。」Gigi 笑說。「火星女神」的幽默，與她高冷外表的反差，正是Gigi 的一大魅力。
回溯6年前，《萬千星輝賀台慶2020》，一眾星夢傳奇參賽者初次登場，這是Gigi的初舞台。年僅15歲的Gigi 壓軸演唱陳奕迅的《紅玫瑰》，表現亮眼。那時的她宛如豔紅玫瑰，氣場強大，對舞台充滿熱情。
可玫瑰帶刺，紅色又讓人覺得難以靠近。
「有日做完gym，喺小巴度收到〈Colors in the Air 原色〉嘅demo。首歌俾我嘅感覺好輕鬆，有種粉紅色嘅感覺，雖然MV出到嚟喺藍色調。」〈Colors in the Air 原色〉為炎明熹 Gigi 加盟Sony Music後，繼《風旅》後發行的第二首單曲。
《原色》並非一首訂製的歌，Demo 本身已有歌詞，它們卻與Gigi 的心境恰巧匹配，「成個感覺好似真係表達緊我自己」。監製Edward 更言，這首歌完全是他印象中日常的Gigi。
「笑 至會可愛吧
如常地對話
感覺到周遭 眉頭額角 的想法」
「我覺得我嘅外表係構成呢個（感覺）嘅罪魁禍首。」Gigi 擁有標誌性的鳳眼，眼角頭尾皆呈銳角，她卻自認是個較鈍角的人。 「眼尖少少、面長少少、身高中上，個樣又比較成熟。如果唔做任何表情，望落有啲惡，高冷，甚至串。」
「我比較內向，唔會主動同大家講嘢。有時（我）會將動作做得好大同誇張，希望（透過）做呢啲動作，拉近同大家嘅距離。」拍攝當日，她主動提出：希望照片裏的她能笑着比Yeah。拍立得照片中的她，她更長hold「鬥雞眼」及嘟嘴表情。她希望用肢體語言，瓦解身上的荊棘。「其實自己唔係咁有銳角，我對所有嘢都冇乜所謂 。」
什麼都無所謂，除了唱歌。
「對於表演，個人會崩緊少少。例如（擔心）眼神會唔會俾多咗？驚自己會唔會做得過火得滯，變得kam同油膩。」Gigi 對舞台表現尤其緊張。「做定所有最壞嘅打算，萬一嗰個位我走音點算？但其實諗嚟都無用。就算練到百發百中，都總會有機會crack。」在CHILL CLUB 舞台上，她與姜濤合唱《Colors in the air》。臨上台前，她一直很忐忑，姜濤暖心地鼓勵Gigi，叫她「唔好咁緊張啦」。「佢（姜濤）成個feel好鬆弛，同自己對比係一個好強烈嘅反差。同埋佢一上台有種好悠然自得嘅感覺，好有自信，覺得自己喺呢方面需要強烈進修一下 。」
「因為太多嘢都唔係你可以控制到。」
結果當日，歌聲無礙，脖子卻落枕。「明明覺又唔幾瞓到，但就瞓咗捩頸。」她無奈地笑了笑。「同事即刻攞藥膏俾我敷，但慶幸條頸又唔係完全郁唔到。要相信所有嘢發生都唔會令件事太差。或者你諗啲好差嘅嘢呢，出到嚟可能係另外一啲差嘅嘢。」既然一切無常，唯有go with the flow。
原色隨著時間，由斑斕褪至泛白。
「我覺得而家嘅原色係白色，想用白色對待大家。因為白色係一個包容嘅顏色，溝唔同顏色都會令（原本）隻色淺少少。」
白，放緩的白。
2021年，Gigi 於TVB歌唱選秀節目《聲夢傳奇》奪冠後，以16歲之齡出道。2024年，Gigi 休息了逾一年。後來，她建立個人工作室，成為獨立歌手。
2025年的平安夜，Gigi 於亞博舉行首個個人音樂會《風之旅 My Voyage Goes On Live》。其後，她於2026年初加盟Sony Music，推出「跳槽後」首隻單曲《風旅》，並舉辦個人新歌發佈暨加盟記者會《THE VOYAGE TO…》。事隔數月，Gigi 再推出全新單曲《原色》。
白，純粹的白。
「我覺得我嘅純粹有少少被磨蝕。」Gigi 的歌途始於12歲，當時家人怕她沒有一份專長及興趣，於是讓她到音樂學院接受歌唱訓練。「當時因為（歌唱）唔係一份職業，所以有啲嘢明知自己做唔到都會放開去做。（如今）我成為咗歌手，亦都有好多人會注視你，好多嘢會喺網上發生。」歌唱由興趣成為職業，表現不再只由老師批判。社交平台上不乏對Gigi 的留言，面對鍵盤戰士，她又怎樣應對呢？
「條文內容評論都只是廢紙
去親手編寫故事
結局也未然」
聲夢傳奇比賽期間，Gigi 從不看評論。「身邊長輩都叫我唔好睇，因為有啲……太不客氣喇。」後來，Gigi 發現評論並非全然惡意，於是她從評論區裏吸取建設性的指點，自我改進。「唔係幾介意大家批評我嘅話語，但我care 自己嘅表現。」過濾評論時，難免因為某些「為批評而批評」的言論而難過。可幸的是，Gigi是個「睇完啲嘢會唔記得」的金魚腦，很快便會把惡意留言忘得一乾二淨。這也是為什麼對她而言，這些「都只是廢紙」。
在新曲MV裏，羊駝和小雞出鏡率很高。「動物好純粹，佢哋想lur口水就lur口水，想痾booboo就痾booboo，想叫就叫。佢哋唔會包裝自己，係我最純粹嘅朋友。」Gigi 淺笑着說。「我依家都（想）盡量搵返當初嘅自己。」動物對Gigi 而言，不只是朋友，更是想要達至的典範。靠羊駝引路，或會找回迷途時弄丟的那份純粹。
「如一天總會發光
最耀眼寶藏
來無視那結果 讓我闖」
白，豐富的白。
在光學上，所有色彩的光交疊，方成純白。Gigi 的白，正是由過去斑斕的色彩堆疊而成。
Gigi 不忘感激一路相伴的樂迷。「多謝歌迷理解我做嘅決定，佢哋係我嘅成長見證人。」不過，Gigi 亦提點歌迷，不要盲目支持她。「如果我今日做咗啲好無質素嘅嘢，大家就唔好… Yeah Gigi 好好呀！繼續呀！唔好咁樣囉。」Gigi開懷地告誡大家，要做個「理智嘅陪伴者」。
21歲的Gigi 出道至今已5年，年紀輕輕已歷經不少轉變。當初的招牌眉上瀏海，如今留長了。眼前的Gigi 身穿短版灰色tshirt，搭配粉藍色恤衫外套，下身穿着寬鬆水洗藍色牛仔褲，看着就是個俐落爽朗的少女。
生活偶爾黯淡，不妨在各大音樂平台一播《原色》，向Gigi 的生活哲學取經。
無力之際，讓我們乘著無力的輕，瀟灑地隨風而去。
風裡，總會找到自己的原色。
分號 INTERLUDE HK 2026
分號 INTERLUDE HK 
發佈留言