2024年8月17日亞洲博覽館5號館，逾5000人正收聽Novel Fergus《盂蘭勝會》演唱會，音樂製作及入場人數均成HipHop界一時佳話；《盂蘭勝會》後，Fergus進入新篇章，除了尋覓海外合作對象外，亦在曲風及人聲處理上有新嘗試，當記者問到Fergus，從其眼中香港聽眾是如何看待其「新曲風」，Fergus直白指：「好多都唔鍾意，好多人都唔啹添嘅，甚至乎無撚啦啦做咗hater嘅。」
「新曲風」面對負面評價，Fergus雖一方面強調試新嘢是「我自己出錢，自己俾機票，自己時間，你理得我」，不過他同時強調，嘗試新事物並不等於自以為然：「我又唔係話我係啱嘅，我係試新嘢，（唔係話）呢個就係有taste，你哋一定要覺得好聽。」
當《盂蘭勝會》印證Fergus早年音樂軌道能殺出一條血路，他「試新嘢」是為何物？明明他繼續行江湖風，字正腔圓地道盡基層生活就能保證成功，為何有常人的路不走，硬是冒住增加haters的風險「試新嘢」？究竟他想試甚麼？
他思索頃刻，笑著回答我們：「因為我想浪漫地做音樂……做自己鍾意嘅音樂。」
｜「彎彎地」
《盂蘭勝會》後一年半，Fergus持續有品牌贊助或廣告活動，發展上看似平步青雲，不過Fergus就有另類思考：「做耐咗，少少彎咗一定有，因為有一個好明顯「得」嘅成功formula喺你面前，你行就係。」創作行業定必非只為賺錢與名氣，但理想與現實生存間總有拉扯，對於如何從中定位：「間唔時去做返浪漫嘅嘢，搵返自己嘅原本。」
不過名氣漸長並非渴求浪漫的原因，Fergus指「浪漫做歌」是從一而終，笑言「舊時浪漫得起，只因無人識」：「屌你《老神仙》講乜撚嘢啊呢首歌，你講解唔解釋到呢？（但）我係呢首歌爆起㗎喎，一路做落去好似《黑桃》都無意思。」未有人鬧，只因舊日在Underground時知名度低，反倒有一兩首好歌，就會因新鮮感被讚作「詩人」：「其實我無咩變，都係繼續做自己鍾意做嘅嘢。」
｜難明的一小塊拼圖
Fergus的「浪漫」中，就包括與各地歌手作音樂交流，其中Fergus去年透過「派Demo」形式，與四位台灣歌手合作成EP《三瞳》，概念有如在西班牙與街邊結他手jam歌，不過外界對《三瞳》評價好壞參半，Fergus亦認為EP在香港與台灣亦不太落地：「（唔落地嘅）原因可能就係因為太浪漫，就真係好浪漫咁帶咗隻demo，去台灣搵幾條友，想有幾落地呢？我覺得係正常嘅。」
「除非我有一個大劇本，我係一個黑社會大佬，我喺香港犯咗法，我要著草去台灣搵四個兄弟幫手……除非係好完整一件事去玩，你就期望佢發生多啲，但呢個我真係浪漫地做，就變成咁樣。」
「咦，原來喺度做音樂唔可以咁隨便。」Fergus作喻新嘗試有如砌一塊大拼圖，若如《三瞳》只「隨便地」呈現當中的一塊小拼圖，大家亦未必能了解。「（《三瞳》嘅）反應又麻撚麻，最重要係我覺得（大家）唔明。」經過《三瞳》的嘗試後，Fergus為求一個更完整的呈現，將原先打算的EP《三瞳》‧序及《三瞳》‧序拆開，以「三首留一首」的篩選方式，結合新歌下做成新專輯《花燈》。
｜浪漫的底線
「依家浪漫極都有啲限度，都要有少少預算嘅。（喺《花燈》）每一隻歌都有原因嘅，喺《三瞳》就無咩原因，純粹想做。」
Fergus新專輯帶著一些明確「想玩」的音樂實驗，有如《萍湖客棧》，歌中形容一件即將發生的大事，連官兵亦到埗：「我就無講係咩大事，純粹係氣氛嘢。」又或是張天穎feature的《Inside Joke》，不懂樂理的Fergus將一些抽象概念，如「拖後幾拍俾我落」交予她處理：「有啲嘢我表達唔到，但佢有一個樂理嘅腦袋，喺佢耳中，只不過係喺16分之7加粒嘢，相當犀利。」
「嗰首直頭係鳩嚟啦」，Fergus所指的《生日快樂wow》則具黑人音樂的韻味，在最基本的鼓hi-hat中，有令人想「跟住un」的flow，歌詞亦「越聽越鳩屎」：「我覺得（首歌）要搵條友去接啲低能嘢。當你諗到低能兩個字，我就諗到一個香港rapper，叫PetPetshawn。」最後二人效果佮佮嵌，尤其曲尾彩蛋，Fergus制止Shawn在喜慶日講出「麻花」的記號，相當過癮。
Fergus形容新專輯像出奇蛋般包羅萬有，有「預咗留言區俾人屌」，亦有「大眾覺得好嘅音樂」的歌。而意指花燈籠的專輯名《花燈》，正具各種理解角度，既具中式姿態，如廟前神鬼樣式般，亦可作傳遞光明之用。Fergus指「花燈」屬形象，能從中「玩咩都得」，尤其當發佈形式不再是零星一兩首，而是一次過發佈十三首歌：「你嘗試喺呢個概念裏面，get 2026狀態下嘅Fergus係追緊啲咩，就等於我今次係扔拼圖，而我嘅主題就係『拼圖』，咁你易啲get掛？」
｜身處香港的音樂環境
Fergus指自己近年將側重點放於氛圍，聽感等音樂層面，將人聲視為一種樂器，但變相網民批評Fergus「唔知唱咩歌詞」，Fergus直認現時曲風，與廣東話以「歌詞」為主的聽歌習慣不同。Fergus分析由八九十年代，到K歌年代的林夕黃偉文，亦是流行以曲詞編監出品，表達大故事：「樂壇一直教育觀眾，好嘅音樂就係有內涵歌曲大意，但你喺club搖嗰首需唔需要有深奧意義先。」
過往Boombap伴奏適合表達歌詞內容，但當近年歐美流行更「跳」的伴奏，亦令Fergus有新曲風的傾向。不過海外盛行的曲風未必是港人所追隨或接受的，記者追問要如何部署兩者差異，Fergus認為只能照做：「你出世喺香港，你唱廣東話，廣東話的確就係你嘅市場，你無辦法怪公眾，『 你唔緊貼世界潮流。』」
香港整體聽歌習慣以及殿堂有既定公式，Fergus雖自認難憑一己之力扭轉文化，但這並不代表無發展出路，現時正嘗試「搞啲細藝」：「喺《孟蘭勝會》之後, 我就係想創造一樣新嘅嘢出嚟，但係我自己都摸緊，最終會摸成點係未知，但輪廓出緊嚟，慢慢砌緊。」
｜放開自己
「有一樣嘢幾好嘅就係，自從我俾人鬧，我又開始get到啲自己喺度做緊啲咩。」Fergus指頭幾年時有被稱讚寫詞厲害，看見自己獲網民讚譽為詩人：「（以前網上討論啲人會話）『 師兄！識貨』，然後第二頁就無。反而俾人鬧，可以俾人鬧十幾二十頁。」
「或者可能你好想保住個很靚嘅，好乾淨嘅位置，但係你遷就佢哋（外界），但變相自己就停留，繼續要做一啲佢哋認為靚嘅嘢，就繼續咁樣hold喺度。」與其滿足外界期望，Fergus認為倒不儘早放開，接受總有人喜歡與不喜歡的。
不過Rapper終究需要靠市場支持，從而在商業面上生存，對於要如何在商業與做自己間平衡，Fergus今次思索了七秒，然後回答：
「無喎，我都係想自己做得開心啲，如果我為咗別人嘅滿意去做，自己都唔開心。老實講，如果我做嘅嘢事真係搞唔掂，或者我生存唔到，呢個又係我應有嘅後果。」
「咁我依家又真係未死，雖然有好多人鬧，但都有人鍾意。」
｜後記：我支持樂壇百花齊放，你呢？
訪問當天是《花燈》推出前一日，所有人都未知道聽眾對Fergus這次新嘗試的反應。專輯推出後，一如他本人所料，評價好壞參半，有人喜歡亦有人不喜歡。過了幾天，我開始看見Threads上有人撰文說已經Loop了《哪個原來寂寞》和《背包》數天，也有人推介熱愛「字正腔圓」的聽眾聽《生日快樂wow》，而Fergus亦在其IG發佈story為Hip Hop新星DRG宣傳新專輯。
每個人都有自己一套對「好作品」的準則，我們可以討論，可以交流，可以擴闊對方的審美眼界，但各人的審美始終會有喜好上的偏差。所以比起「雞同鴨講」式討論單件作品的質素，我認為討論樂壇整體的多元性其實更重要 —— 若大家都做一式一樣的歌，押一式一樣的韻，以一式一樣的方式演繹，樂壇又談何進步，談何發展？
我們絕對有權對Fergus的新嘗試不買帳，說實話我也不是首首啱聽，但啱聽嘅咪放入playlist，唔啱聽嘅咪聽一次唔聽，我又何必阻止他，作為一個音樂人，去對自己的音樂風格作出新嘗試？當然，聽眾絕對有權表達自己意見，Fergus也不能完全不理會市場的反應。但至少，今次他選擇了為自己而做音樂，做自己想做的音樂，做屬於Novel Fergus的音樂……這對一個音樂人而言，就是最浪漫的選擇。
分號 INTERLUDE HK 2026
分號 INTERLUDE HK 
發佈留言