- 要寫好豪哥，就不能太循規蹈矩。
和他做訪問十級難，他太搞笑了……就算在談正經事，他的遣詞、節奏和語氣已經自帶一種渾然天成的幽默，而這份幽默是僅屬於他的，旁人難以複製。訪問當天，我強忍著笑意，和他談遍天南地北。真情流露的說話夾雜在笑話當中，留待我逐一解密。
我感覺，他是我遇過最複雜的受訪者。
訪問開始前，豪哥請求所有共處一室的試當真員工離開。房間只剩下我、攝影師和他三人。他說，我們的問題很deep，如果有太多人在場，他會有點尷尬。
有Feel！比起認真搞笑的豪哥，我更想見到認真不搞笑的蘇致豪。我需要他告訴我，究竟在豪哥那張笑臉背後，正賣力隱藏著甚麼？
- 蘇致豪大學就讀新聞及傳播學系，做過幾年兼職記者，經常需要出席嚴肅的記者招待會，寫中立客觀的新聞。
「我嗰陣時辭職，老細問我，明明做得都幾好點解唔做？我就話，因為太嚴肅，同埋其實寫新聞嘅時候，我成日都覺得啲故仔好悶。」
在撰寫新聞稿時，豪哥愛在本應概括事件的文章首段增加不必要的懸念，就算只是100 – 200字的細格報導，他也想自己的文字更具追看性；在出席記者招待會時，豪哥愛在現場四處遊蕩，最低限度也要到廁所逛一逛，不能像其他「等收工」的記者一樣安座於位。
豪哥害怕沉悶。在他的世界裏，新聞可寫成趣味故事，記招可變成探險場所；讀新聞系，也可以不當記者，走去寫笑話拍YouTube，成為一名全職創作人。
我一直認為，豪哥的思維是試當真一行人中最敏銳的。他一直在觀察，一直在思考，一直在將所思所想內化，為他的編劇和演技提供養份。所以他害怕沉悶，也害怕一成不變的記招和冷冰冰的文字。
這份撐起他日後創作的敏銳，就和他大學時期的經歷息息相關。
- 2013年9月1日，蘇致豪代表珠海學院在全港大專生辯論賽冠軍賽迎戰逸夫辯論隊，比賽辯題是「沿用比例代表制對香港往後的民主進程最為合適」。蘇致豪是反方二副，此位置非常考驗辯論員的即時反駁能力和大局觀。12年前，他尚未有今日的雲淡風輕，決賽發言時感覺有點著急，試圖力挽狂瀾。最終，珠海學院以2-3遺憾落敗，豪哥奮戰過後失落大專冠軍，亦與當時夢寐以求的「最佳辯論員」寶座失之交臂。
「因為（辯論）打得幾好同埋好沉迷嘅關係，變到好鍾意同人嗌交。加上嗰陣時又做記者，啱啱接觸好多嗰啲關於社會嘅 terms（術語），所以就覺得我要拋書包，我要同人辯論，咩嘢都捉住人同人拗。但係就……令到身邊啲人好辛苦。」
在成長的路途上，我們都曾試過熱血地追逐夢想，亦總聽過杯子碰在一起時夢想破碎的聲音。豪哥的辯論夢碎，使他投放更多時間研究創作，才成就出後來的種種經典。然而，即使到今天，辯論在他身上留下的痕跡依舊存在 —— 敏銳、思維具深度、異想天開，這些都成為了普羅大眾眼中蘇致豪的特色。
「我有故意令到我啲片『冇咩想講』。因為喺大學嘅時候，有好多時間我攞咗嚟去同人爭論同埋表達我嘅觀點。去到創作嘅時候，開始做 CapTV ，我就都幾想『搣走佢』。
雖然 CapTV 嘅時候都做好多（時事）抽水片，因為做抽水片就最快又最好反應，但係我都會盡量搵多啲時間，去做一啲幾乎同個世界唔係好關事嘅創作，好似配音片、劇場……
抽水片對我嚟講就係一種報新聞，咁就真係可以有懸念地報新聞……睇下你抽咩水呢？你係想講咩呢？你個立場係咩呢？」
既然做傳統新聞太沉悶，豪哥就靈巧地製作搞笑抽水片滿足自己回應時事的慾望。搞笑已經成為了他很重要的工具。所以，當他說自己一生中最大的目標是要繼續搞笑時，我知道唯獨這一句肯定不是個笑話。
- 在訪問的過程中，我發現豪哥可以繪形繪色又帶點幽默地訴說一段往事，但當被問及自己對事件的內心感受時，他有時就會以笑帶過，又或支吾以對，陷入沉思。
「你會cut走中間啲空白位㗎嘛？因為如果係片，一講我點樣睇創作嗰啲，我驚好尷尬。」
「其實今日主要係會寫做文字專訪，條片只會剪精華俾我哋 PATREON 會員睇。」
「哦……文字……文字嘅話就會冇咁尷尬。」
宣傳時間：如欲解鎖 試當真 訪問片段精華 / 文字採訪後記，只需用每個月一餐飯的價錢，成為《分號》的PATREON會員 —— 支持獨立文化媒體，支持文字有價！今個月仲有試當真專題實體刊物，好抵啊！
- 蘇致豪對游學修的第一印象：
「著拖鞋、踢拖，氣宇軒昂。然後就，好清楚自己要啲咩同唔要啲咩，同埋好肯去表達，亦表達得好清楚嘅一個人。咁所以係『串』㗎，但係嗰個『串』我又唔覺得好負面，（對佢）都係景仰。」
蘇致豪對許賢的第一印象：
「許賢就……嗰時中一嘅學校 canteen（飯堂），佢喺度搞緊笑，我都唔記得咗佢搞咗個咩笑……因為嗰時係新入學嘅頭一兩日，我就開咗個『搞笑雷達』，睇下側邊有咩搞笑嘅人，直至 detect （感應）到佢，個雷達就響到仆街。咁我就…… 我就 respect（尊重），未去到景仰，但就有種『過兩招』嘅感覺。」
如果試當真是一個宗教，三位老闆就是他們的「聖父、聖子、聖靈」，以某種意義上的「一體」支撐著整個頻道的運作。三人各有長短，凹凸互補，頻道的成功足以驗證他們是1+1+1 > 3的組合。在多年的共事間，他們早已熟悉對方的戲劇節奏，也清楚怎樣才能將對方拍得好睇。經歷無間斷式的合作，歲月又會否撲滅他們的創作火花？
「我覺得（游學修、許賢）最大嘅優點係，佢哋都好搞笑，其實應該話佢哋都好幽默。最大嘅缺點就係，但係佢哋好多時候，都唔搞笑……尤其是開咗公司之後。
佢哋講笑話嘅功力冇減退，但係嗰個密度就疏咗好多，我就覺得非常之可惜。我搞笑密度就高啲，普遍場合我都追 80/20，80% 時間搞笑，20%時間就話番畀你聽，我都係一個讀書人。不過佢哋應該志不在此，所以佢哋唔會覺得係一個缺點。」
願游學修和許賢都能做回豪哥眼中那個經常搞笑的人，一同搞笑下去。
- 熟悉試當真的人都知道，許賢愛用「足球」比喻一切，蘇致豪就會以「船」來理解創作。
「我度咗一條『橋』，佢就好似一隻船咁樣。正常就係，你砌好咗隻船之後你就要載啲觀眾去某一個你想去到嘅位。
但係，我好鍾意砌咗船之後就係咁抽走入面，睇吓可唔可以無咗呢度嗰度……如果隻船冇咗個帆行唔行得郁㗎呢？如果隻船冇咗呢兩條木又行唔行得郁㗎呢？我越嚟越鍾意抽走哂入面啲嘢，令到個故事搖搖欲墜咁樣，去到幾乎唔成立。
然之後呢，我就會好興奮地覺得啲觀眾喺一隻搖搖欲墜嘅船度但係佢哋好開心。我鍾意呢個感覺……就好似一個好刺激嘅船長，砌一條爛船出嚟，砌一隻船然後扑爛隻船。
其實呢個比喻嘅意思就係，我好似著重多啲喺『點樣講個故仔』，多過『想講乜嘢嘅故仔』。」
豪哥坦言，自己沒有正統地學習過創作。比起那些有讀過編劇的人，他的故事沒有那麼嚴謹，而是傾向有feel啲。甚麼叫有feel？那個feel有沒有客觀標準？
「有 feel 就係我覺得啱。如果我整一條片喺整嗰個過程同埋出到嚟我都覺得好有 feel，咁我就覺得自己都係一個好有 feel 嘅創作人嚟㗎喇～」
不是沒有標準，而是豪哥本人就是一套標準。每一套劇場的第一位觀眾都是導演自己。做創作，最重要是先建立一套審美，再創作出符合自己審美的作品。豪哥自覺自己大部份作品都很有feel，但他在「蘇致豪是 / 不是一個合格的創作人」這條辯題上卻選擇不了站方。
「我覺得……我鍾意自己啲作品，但係有時我會覺得自己唔 qualify （合資格）係一個創作人。因為，我有時啲創作唔係好服務到觀眾同埋個團隊。即係團隊入面嘅人有時拍完，都未必係好清楚講緊咩。又或者係寫咗啲角色……有時……有時我都未必……」
豪哥陷入沉思。
「唉講好啲先……算啦我話我 qualify 算啦！（笑）」
豪哥又再度陷入沉思。
「我諗吓先……因為……因為……有一個階段嚟講，可能係CapTV、金剛Crew嗰陣，我就覺得我完全冇諗創作係咩，完全冇諗藝術係咩，甚至搞笑係咩。我覺得我做出嚟會好開心呢，我就會做喇，同埋塊白板（出片日程表）寫咗我個名，咁我就會做喇。
好多時係寫完咗個劇本，跟住之後就覺得，其實呢個故仔會唔會係講緊另一樣嘢呢？跟住之後我就再補充，令到佢明顯少少。去到拍嘅時候，又會再加多少少。去到剪嘅時候，就可能佢係講緊完全另一樣嘢喎。咁又可能抆走原本嗰個主題，然後加新嗰個主題落去。但係，去到條片出咗街之後，我有時又會諗，其實會唔會呢條片係講緊呢樣嘢呢？即係好似……個作品唔係我作咁樣。」
然後到了試當真，需要在每週謝票場分享導演 / 編劇感受，他笑言開台早期會迴避剖白創作心得，只會「講吓啲好笑嘢、製作嘅時候有咩 NG 、有冇人遲到、邊個食飯叫咗咩」就草草了事。後來，他意識到謝票場其實是一份工作，片場亦沒有那麼多搞笑素材讓他矇混過關。
「去到你嗰陣你都要講，因為冇人會幫你講㗎嘛！你係個導演，咁你就真係要講你係寫咗個咩嘅故仔。咁好多時就係做借票場之前再睇一次條片，自己就睇吓可以點樣講囉。」
久而久之，豪哥開始學習如何更了解自己和自己的創作，如何更清晰地說好一個故事。若要開發新世界，走出舒適的洞穴，就需要承受陽光的刺眼。當豪哥開始認真釐清自己想表達的東西後，創作就變得越來越緩慢。
「我諗喺2022 2023年嘅時候係比較吃力一啲嘅。即係會卡住咗，因為又漸漸地換咗個方法去創作……但係後來我都有適應到，同埋我都鍾意嗰啲（吃力地創作的）作品。」
「嚟緊要拍最後一條劇場，我想追求就係希望可以服務多啲觀眾，同時，真係砌隻穩陣少少嘅船，但又唔好失去自己嘅獨特性……唔知做唔做到……」
豪哥微笑，輕嘆一口氣。
《老奉日記》是豪哥在試當真創作的最後一條劇場，已於2025年9月23日首播。
看畢。我認為豪哥做到了。你們認為呢？
- 嚴選豪哥五大神級演技（排名不分先後，很難在神級再分高低）
一、西西佛斯打官司
扮演受諸神懲罰，需要不斷推石頭的西西佛斯。由開始時的囂張，被捕時的從容，再到絕望時的憤怒，和開悟後的淡然，豪哥都詮釋得揮灑自如。
二、CapTV一週年台慶鉅獻：片場風雲
豪哥是一名很入戲的演員。例如在《片長風雲》，他要演繹一個不可一世又故作謙虛的明星，他能給予對手很多即時的反應/小動作，讓觀眾信服他。這點很難得。
三、冰島灘古龍
豪哥一雙炯炯有神的大眼睛是他作為演員的優勢。無論是茫然、緊張、悲痛、誠懇，抑或墮入愛河，他的眼睛都能表達情緒，都在說故事。《冰島灘古龍》有神級劇本，豪哥最後的回眸一笑就如畫龍點睛，亦令他成功登上試當真白金像獎的影帝寶座，成為民間視帝。
四、重炮豪傳
豪式幽默別樹一格，就算是扮演認真的球星，都能惹我們發笑。還有非常標誌性的一人分飾兩角，兩個角色都超級入戲，真心癲！
五、記得到的她
個人認為是豪哥的最佳作品，不知為何沒有被提名白金像獎。又會失憶又好記性的角色簡直是為豪哥度身訂造。真的很喜歡Yanny和豪哥這對組合……演技好有火花！
- 在準備訪問時，我們邀請了多位試當真忠實粉絲拍攝告別感言，準備播給三位老闆觀看（片段請見《分號》@interludehk_ IG Reels)。影片中，有人笑著回顧自己與試當真的點點滴滴，有人道盡試當真對他們的救贖之恩，更有人在鏡頭面前聲淚俱下地表達不捨之情。
面對粉絲們的盛情，豪哥直言有時會不懂得應對。每當有粉絲寫千字文向他表達愛意或訴苦，他總會左思右想，然後精心設計一個笑話回覆，期望能逗笑粉絲。在他眼中，搞笑就有如說謊，能為他帶來許多方便。「有啲嘢你唔想答，咁你就搞笑，咁就可以唔使答。有啲嘢你都唔知嬲唔嬲好，傷唔傷心好，咁你又可以搞咗個笑，啲人就會過咗。我就覺得好過講大話。」
當日我準備好的訪問主題是 “Move On”。我問豪哥這些年來有甚麼是他 move on 不了的，他說，就連我在問他這條問題時，他的直覺都在想有甚麼可以用來搞笑，「我連 move on 呢個字都 move on 唔到」。他選擇逃避。他開始談自己會move on不了創作的死線，move on不了狂叫外賣的壞習慣，現在一時三刻醒不起有何move on不了……
我鼓起勇氣問豪哥：「你會唔會有時用咗『搞笑』呢樣嘢去逃避一啲嘢？會唔會有時係會呃埋自己？」
他認真思索，摸摸額頭，笑著回答：「我都有問過自己，我有問過自己……呃……我覺得應該有嘅，但我都唔記得呃咗啲咩……可能呃得太撚透，哈哈！」
- 「我想問吓，你覺得香港呢個地方對你嘅創作有冇特別意義？或者係對你重唔重要？」
「我喺度住嘅，我喺度出世嘅，所以好重要。
會唔會移民？其實我好細個就成日諗，但係一直冇計劃。同埋我都唔似會。要我計劃移民呢件事對我嚟講太難……唔再 care 就應該唔會嘅，好難啫！
但係你話會唔會拉遠啲睇，然後好多嘢笑咗佢算，就會囉。
即係好微妙嘅我覺得……譬如我哋謝票場都會成日講一啲拍嘢甩漏呀，然後會講笑咁講咗佢。但係其實拍嘢甩漏嗰啲可能好大鑊㗎嘛，搞間公司可以發生好多嘢，但係你會攞嚟講笑。
笑咗佢，就拉返少少距離，咁就冇咁棘囉。」
紮根香港，越棘越笑。
- 「可能就係好愛，先會咁複雜」—— 蘇致豪（26/10/2025 試當真 最後一個直播 ）
蘇致豪是我遇過最複雜的受訪者。
他很快，又很慢；很敏銳，又很遲鈍；很愛搞笑，又很會認真；很習慣抽離，又很懂得代入；他和我們很像親近，又似疏離。活在厭世代，他選擇掛起笑臉，以笑遮苦。
我摸不透豪哥那張笑臉背後賣力隱藏的秘密，但我視他的「搞笑」為一種對自己、對身邊人和對觀眾的保護和愛。世界很殘酷，時勢很壞，香港人情緒很差，記者問的問題很難答……大家笑一笑，豪哥哥幽你一默，樂極忘形的我們就能置身快樂時代，毫無代價唱最幸福的歌嗎？
不能。但，願我們可。
祝蘇致豪、蘇豪、豪哥、豪哥哥、重砲豪、MC $oho：
繼續沉迷，繼續放棄，在遠離時代和煙火的地方，豪 無代價 搞最幸福的笑。
願你可。
分號 INTERLUDE HK 
發佈留言