｜前世今生
《THE FIRST TAKE》係日本YouTube音樂頻道，2019年11月由Sony Music Entertainment Japan推出。起初只係簡單概念：請歌手喺白色錄音室一鏡到底表演一首歌，捕捉最原始聲音。疫情期間，頻道轉型畀歌手遠距表演，結果爆紅，訂閱人數過千萬。依家已成為日本音樂標竿，吸引本地同國際歌手上陣，總觀看次數超過60億。
｜節目特色
節目最大賣點係「一鏡到底」：歌手面對單一麥克風，無編輯、無重錄，全部現場感。工作室係全白設計，好似鏡子房，感覺純淨無雜質，歌手只需專注唱出真我。呢個格式考驗歌手實力，同時令觀眾感受到音樂嘅即時張力，好似親臨演唱會咁親切。
｜爆紅迴響
自2020年起，《THE FIRST TAKE》靠YOASOBI等表演爆紅，部份影片破億觀看，帶動日本音樂潮流。頻道唔止提升歌手曝光，仲改變咗音樂傳播方式，令素人同新秀都有機會一戰成名。同時，節目嘅國際影響力大，吸引K-pop同華語歌手參與，成為全球音樂迷必追平台。喺香港，好多影迷都透過呢度發現新歌，證明頻道嘅跨文化魅力。
｜香港歌手都有份？
香港首位上《THE FIRST TAKE》係陳柏宇（Jason），2023年表演《你瞞我瞞》同《有天》，開創華語先河，兩首歌加埋已經累積近7M views！。
今年ViuTV舉辦《Chill Club X THE FIRST TAKE: THE STAGE OF VOICE》歌唱比賽節目，比賽分為「歌手組」同埋「素人組」。歌手組就由力臻（Lagchun）勝出，成功登上節目唱出新歌《Flyin’ for your love 2882點85✈︎》，至今已獲接近1M views。「素人組」冠軍就係仲讀緊大學嘅蘇詠淳（Vincy So），佢喺The First Take表演歌曲《Sora》，亦已砍獲490K views。
上得The First Take都係實力唱將，作為香港人又點可以唔支持幾位香港代表？快啲上YouTube聽歌啦！
｜歌手的話：
我地聯絡咗幾位登上過The First Take嘅歌手，佢哋有啲說話想同各位《分號》讀者分享～
陳柏宇 Jason：
作為香港首位登上 THE FIRST TAKE 的歌手，至今仍深感榮幸，但當時的壓力其實並不少。還記得錄音前都處於極度緊張的狀態，最大壓力源自整個赤裸的錄音室 set up。平時於錄音室錄音，可以有 second、third、forth take，但 THE FIRST TAKE 只給一次機會，更像是一場無觀眾、無現場氣氛的 live 演出。不過唱完後，整個人瞬間放鬆，就像完成一場演唱會那樣，好玩！
力臻 Lagchun：
置身 THE FIRST TAKE 這個全白色、純淨的空間演繹新歌〈2882點85✈︎〉，所有的觀感都放得很大，緊張的情緒讓氣息有點混亂。完美，未必稱得上，但那就是紀錄了力臻在那一天、那一個空間的聲音。這次 THE FIRST TAKE 的旅程對我來說是一次真正的成長，以往我經常問自己：「如果爸爸沒有離去，我的星途會否更不一樣？」
在前往日本的四個半小時內，我有了答案。所謂一切都是最好的安排，我卻認為就算不是最好的，我們也沒得怎樣。話雖如此，以什麼心態去接受，仍然掌控在自己手中。好感恩爸爸的離去讓我真正成長，不然我也未必可以乘風翱翔，捉緊這一次登上 THE FIRST TAKE 的機會。
蘇詠淳 Vincy：
知道這個奇蹟般的機會降臨到自己身上時，除了期待之外，身為一個素人，其實內心充滿了不安。正因為熱愛日本音樂，所以「 The First Take 」在我心中一直是神聖的存在。
我曾經不斷否定自己，認為自己能力不足，所以在出發前不斷想盡辦法令自己在短時間內提升技術。但我發現，這份焦慮令自己開始忘記追夢的初衷——小時候的我會帶著怎樣的心情去演唱呢？其實只要帶著純粹的熱情唱歌，自然能感動別人。
於是我決定放下焦慮，一邊唱著「Sora」，一邊想像自己在藍天下奔跑。在空白的錄音室裡沒有其他依靠，只能相信那一瞬間的自己。在我鼓起勇氣開口時，我就知道那是我最享受唱歌的時刻。若在往後的日子遇上困境，這次在The First Take的經歷都能給我力量，讓我相信當刻的自己可以做到想做的事。
｜最廣為人知影片之一：YOASOBI《夜に駆ける》
YOASOBI嘅《夜に駆ける》（Yoru ni Kakeru）係經典爆紅作，2020年上《THE FIRST TAKE》，一鏡到底表演破億觀看。當時正值疫情，ikura 嘅演繹情感爆發，帶動小說改編動漫熱潮。呢段影片令YOASOBI紅遍全球，成為頻道轉捩點，好多粉絲都話聽完即刻想重溫原作。
｜最廣為人知影片之二：Aimer《残響散歌》
Aimer喺2022年表演《残響散歌》（Zankyosanka），源自動漫《鬼滅之刃》配樂，影片觀看過億。佢嘅空靈聲線配一鏡到底，畀人雞皮疙瘩。呢個表演強化Aimer女神地位，香港動漫迷特別鍾意，證明《THE FIRST TAKE》對J-pop同動漫文化嘅推廣作用。
｜最廣為人知影片之三：Dish//《猫》
Dish//喺2020年表演《猫》（Neko），影片破5億觀看。主音喺《The First Take》嘅真摯演出，表達出青春情感。呢首歌本來就紅，表演版更添深度，令頻道吸更多樂團粉絲。香港聽眾都話呢個版本最打動人心。
｜結語
《THE FIRST TAKE》為香港音樂人帶來新舞台，亦證明一鏡到底嘅魅力。快啲去YouTube重溫呢啲表演啦！
你最鍾意邊個香港歌手嘅演出？留言分享，支持我哋繼續介紹更多有趣嘅文化啦！
撰文 // 劉諒 @lauleung.thinking
設計 // kaiser
分號 INTERLUDE HK 2025
分號 INTERLUDE HK 
發佈留言