文化通俗指南 #004：香港都市傳說：七月十四鬼節怪談

農曆七月十四歷史

農曆七月十四係香港人俗稱嘅鬼節，又叫盂蘭節或中元節。呢個節日起源自佛教嘅盂蘭盆會，講述目連救母嘅故事。後嚟融合道教同民間習俗，變成祭祀祖先同孤魂野鬼嘅日子。

喺香港，七月十四被視為鬼門關大開，仙人會出嚟人間遊蕩。而尚在人世嘅老百姓就會燒衣紙、辦盂蘭勝會仙人享用。呢個傳統至少從清朝就流傳落嚟，反映華人文化對祖先同亡靈嘅敬畏。

都市傳說喺香港唔單止係嚇人故事，佢哋更加反映社會恐懼、歷史事件同文化傳統。例如日佔時期嘅慘事、現代人嘅都市壓力，都會變成鬼故傳播。呢啲故事有警示作用，提醒大家小心行事，同時畀香港人喺忙碌生活中增添刺激同集體回憶。喺鬼節七月十四，呢啲傳說就更添氣氛，成為文化一部分，增進社區聯繫。

「高街鬼屋」位於西營盤高街，曾經係精神病院同外籍護理員宿舍，1939年起用作精神病院，1971年閒置後改建為社區大樓。傳聞日佔時期曾係日軍刑室，附近係亂葬崗，陰風陣陣，常有靈異事件。依家係法定古蹟，2023年起拱形遊廊免費開放，但夜晚去就唔好亂行啦！

中文大學經典鬼故，有兩個版本：一講女生跳車時辮子被夾，頭皮撕裂身亡，亡魂留校搵替身；另一講學生遇白衣長辮女生，回頭見無五官臉，嚇到暈低。校園有條「辮子路」，夜晚行過總覺得有人跟住。呢個故事流傳多年，成為中大學生嘅集體回憶。

彩虹地鐵站有三條路軌，中間嗰條從未見列車經過，傳聞試車時有靈異現象，有人離奇死亡，甚至通往鬼門關。後嚟港鐵澄清，中軌通往九龍灣車廠，供車務調配。但呢個傳說仲係嚇到好多乘客，夜晚坐車記得唔好亂望！

大埔新娘潭係出名猛鬼嘅地點。傳說新娘出嫁途中溺斃，或不甘被迫出嫁跳潭自盡，冤魂不散。呢度亦曾發生多宗交通意外同離奇命案，夜晚去行山總有陰森感覺。依家搖身一變熱門遠足點，但網民提醒鬼節前後最好避開，安全第一啦。

90年代九廣鐵路廣告，六個小朋友扮玩火車，畫面卻出現第七個身影，粗糙畫質毛骨悚然。後解釋拍攝用20個小朋友替換，第七影係誤會；另有說小女孩嘴角似流血，實為肌肉紋路。但呢個廣告嚇壞好多香港人，成為經典都市傳說。

襯住農曆七月十四，小編刻意精選呢啲香港都市傳說畀大家增添鬼節氣氛。其實除咗故事嚇人，都市傳說更係文化寶藏，提醒我哋珍惜歷史同傳統。快啲留言分享你聽過最嚇人嘅鬼故啦！