麥兜：香港嘅Chiikawa？
近年，日本有個超人氣角色叫Chiikawa，憑可愛同生活化嘅故事俘虜咗好多粉絲。麥兜喺香港就好似Chiikawa咁，佢嘅傻乎乎同溫暖故事，承載咗香港人嘅感情同回憶，係我哋嘅「本地版Chiikawa」。或者調轉咁講，對啲由細細個開始睇麥兜嘅香港人而言，Chiikawa先係「日本版麥兜」。
麥兜的誕生
麥兜係由香港漫畫家麥家碧（Alice Mak）和編劇謝立文（Brian Tse）喺1990年代創作嘅卡通角色。首部動畫電影《麥兜故事》喺2001年上映，之後仲有好多續集同電視動畫，陪伴住香港人成長。
麥兜嘅性格
麥兜係一隻傻更更、好可愛嘅小豬。佢成日發夢，夢想去馬爾代夫、做太空人，但現實總係同佢開玩笑。呢種「有夢想但實現唔到」嘅遺憾美，好搞笑之餘又好感人，映照唔少香港人嘅故事
麥兜與香港
麥兜故事入面嘅香港 麥兜住喺深水埗嘅舊樓，成日去茶餐廳食雲吞麵，生活好似你我咁貼地。故事入面仲有好多香港地標，例如維多利亞港、太平山頂，處處都係香港人嘅集體回憶。
麥兜與香港
麥兜唔單止係小朋友嘅偶像，連大人都會對動畫嘅對白產生共鳴。佢嘅故事反映咗香港人嘅人生態度：就算生活艱難，都要笑住面對。麥兜已經變成香港文化嘅icon，仲經常出現喺旅遊推廣活動！
獲獎無數嘅《麥兜故事》
2001年上映嘅《麥兜故事》電影除咗獲得 第21屆香港電影金像獎「最佳原創音樂」、第39屆金馬獎「最佳動畫片」、漢城國際動畫節2003「最佳動畫長片大獎」等亞太地區電影獎項，更加喺有「動畫界奧斯卡」之稱嘅安錫國際動畫影展榮獲「最佳動畫長片」，為港爭光！
麥兜經典片段 ——「Un腳」
Respect黃秋生同吳君如，真係配得好正！
醫生：唔好意思，內外全科,唔包un腳！
麥太：吓?咁內外全科包D咩架?
醫生：一般嘢囉！
麥太：點一般法呀?
醫生：普通病囉！
麥太：點普通啊?
醫生：普普通通頭暈身興咁囉！
麥太：仲有呢?
醫生：仲有小兒驚風、外感發冷、無名腫毒、外傷骨折、四時感冒、腰酸背痛、小便不暢、脂肪積聚、性慾減退、大頸泡、大眼肚咁囉！
麥太：仲有冇呀?
醫生：仲有嗰D皮膚痕癢、精神緊張、健忘失眠、暗瘡、頭皮、飛滋、小腸氣、腎水不足、頭暈耳鳴、口乾舌燥、生蛇生鱔、屁股生瘡、尿頻、雞眼、胃酸過多、膽固醇過高、吐血嘔奶、鼻塞塞嗰D囉！
麥太：仲有呢?
醫生：仲有發嘔竇、發雞盲、發瘟發ti騰、飛蚊症、發耳賺、口淡淡、面青青、生蟲生積、車胎肚、鬼祟肉、拜 拜肉、出水痘、生鼓脹、禿頭、大冇腦、大眼叮噹、蚊叮蟲咬、鴨那腳、un腳、主婦手、香港腳…
麥太：哦!你講左un腳！
醫生：我幾時有講un腳呀?
麥太：我聽住你話un腳架啦！
醫生：我先至唔會！
麥太：拿你明明話發嘔竇、發雞盲、發瘟、發ti騰、飛蚊症、發耳賺、口淡淡、面青唇白、生蟲生積、車胎肚、鬼祟肉、拜拜肉、出水痘、生鼓脹、禿頭、大冇腦、大眼叮噹、蚊叮蟲咬、香港腳、鴨那腳、同埋un腳啵！
醫生：我點會咁講呀?
麥太：咁你講咩呀?
醫生：講緊D普通野囉! 點普通呀? 普普通通傷風咳嗽囉！
麥太：仲有呢?
醫生：仲有嘔黃膽水、夜尿、打乞痴、流鼻涕、扁桃腺炎、腳丫痕癢、骨質疏鬆、胃腩下垂、打思it！
麥太：好似仲有啵！
醫生：仲有依個懵口懵面、戚眉戚眼、耳後見腮、尖寒尖凍、肌肉酸痛、姣C燉篤、風濕骨痛、喉嚨腫痛、冤頭縮頸、腰長腳短、心神恍惚、腳仔軟軟、柯爛bat、發牙痕、汗多潮熱、脫髮甩毛、前列腺發、大眼叮噹、發嘔竇、發雞盲、發瘟、發ti騰、飛蚊症、發耳賺、髀”makmak”、眼啤啤、鬼祟肉、拜拜肉、痴孖筋、長短腳、鴨那腳、主婦手、unun腳、香港腳…
麥太：拿！ 又講un腳啦！又講啦！
醫生：唔，我睇你真係發耳賺啵！
麥兜經典片段 ——「火雞」
林海峰嘅旁白真係超級正……
「後來我先知道，
一隻火雞由出世到俾人劏，
都不過係幾個月之間既事。
啫係話，隻火雞死咗之後，同我地一齊既日子，仲長過佢自己本身條命。
我仲發覺到，
火雞既味道，未食同食第一啖之間，已經係最高峰。
之後，不過都係食開就食埋落去咁解。
我無哲學家既頭腦，唔知呢兩樣野要得出啲咩道理。
但係呢啲諗法，係我長大之後，係一啲同聖誕節無關既日子，無端端咁係我腦部出現過兩三次。
1次， 係我自己既婚宴上。
1次， 係我媽媽火化嗰日。」
編者最愛金句
「我爸爸想番去以前唔知邊度
我媽媽淨係諗住以後唔知邊度
就得我一個，留係而家。」
——《麥兜菠蘿油王子》（2004）
結語
麥兜唔只係一個卡通人物，佢係香港文化嘅一部分。佢嘅故事笑中帶淚，讓我哋反思人生嘅苦與樂。無論你係00後定80後，麥兜總有一刻勾起你嘅香港情懷。 你最鍾意麥兜嘅邊個故事？快喺留言區話我哋知！如果都係麥兜粉絲，記得Like同Share，支持我哋分享更多香港文化故事！
分號 INTERLUDE HK 
發佈留言