Haven Brews 開業於2023年，短短兩年間已經在多倫多港人群體入面聲名鵲起。Haven，指的是避風塘、安身之所，一間咖啡店，以避風塘為宗旨成立。《分號》早前有幸採訪Haven Brews 負責人Andrew，嘗試了解Haven Brews的紥根與嘗試。
Brewing Coffee Serving Community
「香港好多人過嚟啦呢幾年，特別係救生艇計劃啦 ，而我嚟到之後就開始諗下有啲咩可以做啦」Haven Brews 的開始，其實都同移民潮直接相關。「我的拍檔以前在香港也是做社區咖啡店，所以我們就想將呢個概念喺呢邊試下」。
既然社區為本，咖啡店的選址都扣連香港人的群體命脈。「佢哋叫North York/Sheppard做新手村，我哋就想喺新手村附近搞。」目標簡單但莊重，「我希望提供一個避風港，等一班香港人嚟到加拿大有個安全嘅地方，大家可以飲杯咖啡傾下計，就是一個這樣的概念。」
選址之外，佈局亦藏心思。Haven Brews 希望顧客留在店內的時間不止於一杯咖啡，而駐足停留想像社區。「Brewing Coffee Serving Community」Andrew 肯定咁答。「我有個拍檔專門做黑膠碟嘅，有啲日本、香港嘅黑膠碟都會喺到 。另外有藝術工作室。我哋有個Partner以前做開Art Studio ，譬如小朋友星期六日可以學畫畫，同時每個月都有組織在這裏搞讀書會。」
由咖啡開始
社區的構想要一步步來，而第一步是做好咖啡。Andrew直言，Haven Brews 要做的是好的手沖咖啡。「對於好多香港人嚟講，佢哋嚟到有份好熟悉嘅感覺。因為香港好多呢類型嘅咖啡店嘅，特別啲文青啲嘅朋友，係好鍾意搵啲咖啡店做嘢，所以好多朋友嚟到都覺得好香港好親切。」
Andrew 談及了一些Haven Brews 製作咖啡的獨有要求，例如對咖啡師的要求是統一：「我哋會做Tune shot。有啲咖啡師可能做開第二啲鋪頭，我話唔得喎，要改返我哋嘅口味，這就是我們對品質的要求。」」Andrew 亦要求店員製作taste note 放置於咖啡豆附近，協助客人分辨咖啡豆的種類及味道，同時留給客人想像味蕾的空間。「例如邊隻豆nutty 定fruity，邊個dark roast 邊個濃啲呀」「我哋都要照顧唔係咁專嘅客人，話俾佢哋知本身啲豆處理完，roast完之後就會有呢啲味出嚟㗎。」
咖啡文化
Andrew認為，加拿大發展咖啡文化比較慢，主流都仍然係Tim Hortons，甚至係Starbucks，換言之較少要求高的精品咖啡店。
他認為這是指香港人介入甚至改造多倫多的咖啡文化的契機。「慢慢而家多咗香港人嚟咗之後，有啲香港人都會開新嘅精品咖啡店。我哋希望呢個市場會慢慢大，變咗成個多倫多真係識飲咖啡多啲。」
流行文化的精髓在於當有一班人願意投放心機鑽研，再吸引一班願意欣賞的受眾，新的文化風氣就自然應運而生。Andrew 相信的，是潛移默化植入人心。「雖然都會有人入嚟，我要杯double double，咁我話我哋冇double double。」而本地的客人開始係有個轉變。「 我哋都要慢慢同佢解釋，有啲豆可以俾你揀，但我哋出嚟嘅味道係冇vanilla latte，因為我哋冇Tim Hortons 嘅vanilla syrup。」
留在客人的味蕾只是初階，Haven Brews 希望令自身的咖啡文化獲得權威認可。Haven Brews全部請都是香港過來而以往喺香港有經驗的咖啡師，甚至乎有咖啡師參加了今年加拿大一個全國性嘅拉鐵藝術（Latte Art) 比賽。
不過，雙拳難敵四手，香港人要在多倫多的咖啡文化「插旗」，甚至重塑，單靠Haven Brews 並不足夠，而需要一齊「做大個餅」。Andrew 指向櫃前的咖啡豆，「喺卡加利（Calgary） 有間叫Sought and Found 嘅Coffee Shop，係一個香港人開嘅，我哋有一包佢哋嘅豆」Haven Brews的成立都同Sought and Found 緊緊扣連。「最初我哋嚟到，我同我合伙人 Chris 就飛咗過去卡加利幾日，去Sought and Found學習點樣分貼士俾我哋啲員工， 點樣收貼士等等…..佢教咗我哋好多，再喺卡加利寄啲豆過嚟。」Andrew亦不忘向記者推介新的咖啡店，「最近有一間有兩個香港人開的，叫Foreword Coffee，就細細間自己做埋炒豆。 啱啱黃色嗰兩包喺下面，就係佢哋Foreword嘅豆。」
多倫多港人的咖啡圈子都較緊密，往往店與店之間的咖啡師都認識大家。「 我哋有啲咖啡師，做完呢度都去Hatch（另一家較大型的多倫多咖啡店）做呀」「唔同舖頭嘅消息大家都知道。 同埋一搞咖啡比賽就話，所有人都去曬，甚至乎有圍內較資深嘅咖啡師去做出面比賽嘅評判。」
聚腳/社區支點
言談間，說到對社區的聯想。翻看Haven Brews 的社交媒體帖文，採訪團隊都看出Haven Brews介入乃至經營社區的各種嘗試。
最為人熟悉的嘗試，是Haven Brews 作為活動場地。「其實我哋可以坐到60人，可以搞小型嘅聚會，就開始有啲人試過喺度搞音樂。」Haven Brews短短開業兩年，曾接待不少岀訪多倫多的香港音樂單位，包括今年三月Luna is a Bep的加拿大探親之旅。「Luna之前我哋搞過一次Serrini嘅小型音樂會，然後同一個人就 approach 我哋，話喂LUNA想做喎。佢來北美想喺度搞兩場，我話可以繼續喺到搞。一間咖啡室，唔算好大，可以近一點去跟觀眾接觸，而60-70人都是一個好的規模，就係咁樣促成跟這些人去合作。」
Andrew 指在多倫多籌備港人活動並不複雜，「不像香港這麼忙，其實你搞活動那些人就來」， 「之前有另一班朋友想做電影放映，上個月才放了一套，就係許鞍華第一套片投奔怒海。」
Andrew 一再強調，Haven Brews 的定位是社區入面的精品咖啡店，並非公益，但不只是商業。介乎兩者之間遊移，需要不斷思考品質與可持續性。「很多人問我們會不會開分店，我哋暫時都冇呢個計劃嘅。同埋我哋都唔係話想好快做好多分店嗰種模式，反而經營好呢個地方，俾人知道呢個點係最重要。」
要真正實踐多元共融，必須擴闊心胸。身在多元共融的多倫多，Andrew 也談到在地的社會觀察：「可能一開始就專注在香港，但是來到這裡你會發覺有更加在地的問題，例如Food insecurity、難民等等。」即使具體將來不知道有什麼可以繼續做，但Andrew 認為把握機會同不同族裔合作才是真正介入多倫多的社區。
Haven Brews另一個嘗試在於令自己被看見。Andrew 向記者預告：「多倫多每年十一月有個藝術展覽叫做 Nuit Blanche ，由夜晚7點到早上7點通宵開放。去年有個藝術品就是我們其中一個Partner去搞的，而今年我們用成間舖嘅名義申請加入。咁佢批咗我哋，最終現在十一月Haven Brews就會有一日變成一個展覽的地方。」Andrew 的語氣都變得興奮：「到時就應該有個地圖，讓人知道哪裡可以看。我希望那晚就變成一個 festival。咁我哋都好開心，因為真係進入好在地好多倫多嘅一個活動。」
但Haven Brews真正最核心的嘗試，是繞著離散的命題走來討論離散。Andrew 認為，移民的共同經驗能連接香港人與其他族裔群體，亦吸引他們留意Haven Brews。「有些非本地人參與我哋嘅活動會講到嗰種離開自己家鄉，去到一個新地方生活，而Haven Brews 就係安全嘅代表。」但Andrew 從不直接指出離開之後該如何，而是著重塑造Haven Brews 成為敞開心扉的safe space，讓大家分享一路以來的心路歷程。「以往搞過個展覽，當時係收集咗好多唔同嘅故事，就圍繞離散啦。咁我哋就會將嗰啲故事嘅明信片、錄音當係一個exhibition咁展覽。」駭浪與驚濤/還餘下多少海哩才到埗，至少今天在Haven Brews 看見了彼此。
結語
Haven Brews 用金繼作為店鋪的商標。Andrew 向採訪團隊解釋背後的用意：「爛咗嘢可以黐返埋一齊 —- 我哋舖面嘅金色線就係可以將大家可以彼此去connect。」
「我們的避風港希望這裡會平靜，你人可以有個安全嘅地方，雖然外面有浪，但這個地方就是將破碎的都重整。」
有什麼打破了，又該如何修補。金繼的手藝來自日本，寓意有缺陷不應自怨自艾，小修小補下更趨璀璨。Haven Brews 沒有追求鎂光燈，而是願意低調地連接一個又一個集體創傷後無地自處的香港移民。「我哋其中一個partner係art therapy。咁我哋通過art therapy幫佢哋process好多曾經在香港經歷的事。好多時候係講緊嗰種失去了香港的一些東西，你怎麽可以重新再找到自己，重新再連結到自己。」
「我自己都係。我冇想過我要做咖啡室，放低了所有香港在做的事，重新去學習，重新去練習，這個是一個層面；第二個層面就係你嚟到呢度都要喺呢度生活，同呢度嘅地方有連結。」
翻檢背囊/直到拾回自己，反覆往來/又再做回自己。Haven Brews只希望給予一個安全地執拾行裝的空間，飲一飲咖啡，拍一拍身上客塵。時代太多催迫與驅趕，宏願是一刻安定。
撰文：Thomas
採訪團隊：Wesley，Aiden，Rachel
分號 INTERLUDE HK 
發佈留言