｜前言：「末日」與「末日感」
在7月5日的破曉時分，在所謂的「末日」來臨前，身在香港的諸位在想些甚麼呢？你們有為末日後不用再上班而興奮過嗎？定還是你們會為曾經繁華的香港變成頹垣敗瓦而感到心痛？
當然，我們已經「大步欖過」，而且不止一次。瑪雅預言、《我所看見的未來》、核彈威脅、人工智能崛起……世界要被毀滅掉，可以有千萬種方法。但渺小如我們每一位，區區星斗市民，面對改變世界格局的天災人禍，又該如何應對？「末日」要來，誰都躲不掉，然而更大的威脅其實是我們每一位都曾深刻感受過，那確確實實存在的「末日感」。
「末日感」意指當人們開始認為末日不再是無稽之談，更有可能在不久的將來發生，繼而產生對於末日來臨的種種想像。而「末日感」是具傳染性的，每當末日預言興起，傳媒為求流量渲染恐懼，民眾之間以訛傳訛，人云亦云，即使天未降異象，超市和便利店都會被搶購一空。究竟「末日感」從何而來？又該如何克服？
面對「末日」，作為人類其實能做的很有限，畢竟災難發生防不勝防；但面對真切感受到的「末日感」，我們則可透過思考梳理，以哲學的角度解構。今期專訪，《分號》邀請了來自好青年荼毒室的白水，和各位一起探討「末日」和「末日感」。
｜「末日天秤」上的兩種極端
首先要問白水的問題是：你相信世界將會毀滅嗎？
「你問我有冇一個好明確嘅證據證明我哋今日真係會末日呢？我覺得就未去到。但係你問我發現最恐怖嘅一樣嘢就反而唔係末日本身，而係末日感。」
白水認為真正的末日其實並不可怕，因為末日來臨一刻我們已經失去知覺，但持續的末日感更令人感到恐懼。末日感令我們開始相信世界有一天不會繼續，日常的種種一切都會土崩瓦解，而這種感覺是平常的我們從來沒有的。
「你會覺得今日我生存緊，聽日又繼續生存，後日又繼續生存，即係可能未必係good days（好日子）或者bad days（壞日子），但你起碼你知道啲嘢會繼續。原來有一個可能性話畀你知原來（世界）係可以冇得繼續嘅。我覺得呢樣嘢先係最恐怖。」
常說「太陽照常升起」，但萬一如果太陽真的不再升起呢？那時候馬不能照跑，舞不能照跳 —— 這種對世界不再存續的想像才最嚇人。求生其實是很直接的生物本能，大部份人的一生都在躲避死亡。羅斯福總統曾言：「我們最需要恐懼的，是恐懼本身。」末日並不可怕，死亡並不可怕，可怕的是對兩者的恐懼，因其存在我們心中，不經不覺間影響著我們的每一個決定。
然而天秤的另一邊，又有一群人期待著末日。面對這種悲觀的末日觀，白水是這樣說的：
「呢個想法係好desperate（孤注一擲），一係就覺得宜家嘅生活好唔值得活，有啲外力結束個生命就最好喇；一係就覺得宜家嘅生命係唔好，末日有可能帶黎一次大洗牌，可能可以搏一搏，令自己成為社會嘅winner（贏家）。我覺得有呢兩個想法都好慘，係要好絕望先會咁諗。」
白水強調自己是理性又樂觀的人，在他的世界觀下其實只要未「衰到貼地」都不應該期待末日。
「雖然我自己都唔係過得好好啦，但要諗嘅係末日之後未必會更好。用抽啤牌做比喻，就算你宜家係一隻葵扇三咁，重新洗牌都可以係抽隻再細啲嘅階磚三。要諗嘅係重洗有幾多機會真係可以令你抽到更好嘅牌。所以問我想唔想重新洗牌或者末日？我自己係唔想嘅。」
｜活出人生價值，以哲學尋找平靜
白水認為，要應對揮之不去的末日感，我們應該要活到最盡：
「就當嗰個係最後嘅人生，我地要思考嘅係點樣令最後嘅人生Live The Most（活出最多的價值）。唔好浪費你嘅人生。而你嗰個（人生）價值，或者你嗰個（人生）意義係點樣，我相信好多時係要你自己去搵、去建構。 」
如何才算Live The Most？每個人心中都有自己的答案，有些人可能一早心裡有數，有些人可能要用一生去尋找，但答案從來不止得一個。白水和好青年荼毒室即將走到第9個年頭，寫過數千篇文章，拍過幾季《哲學係咁傾》，面對過數之不盡的高與低。筆者猜想，13位始創成員當初成立哲普團體，除了看不過眼01哲學之外，更多的是想略盡綿力推廣思考，教育公眾，活出自己的價值。
白水表示，哲學其實本質上就是「企後一步」思考問題，能為大家針對不同事情提供新的視角。以歷史學和歷史哲學為例，研究歷史學的話，可能會根據不同的方法研究帝王史、制度史，科舉史等等；但歷史哲學就是站後一步，去研究該位研究對象究竟是甚麼、有甚麼研究價值、有甚麼意義……甚至再站後一步問：甚麼是歷史？歷史有沒有真假可言？歷史有沒有客觀可言？
「所以其實你永遠都可以有X X哲學，而哲學就係褪後一步問嗰個X X係啲乜，當然從中會引伸更加多嘅問題……所以有啲人就覺得，哲學就係一個褪後一步嘅學問，研究關於一樣嘢嘅本質，甚至乎有冇本質。」
故哲學包含的可以是很切身的議題，同樣亦可以離地萬丈高。對普羅大眾而言，象牙塔內的討論可能與你無關，閒時亦不會思索「甚麼是知識？」之類深奧又無解的哉問。但對以哲學作為專業的白水，某些「離地」的哲學議題反而是他在動盪局勢裏的安慰劑。
「所以當你真係去探索呢個（哲學）學問嘅時候，係可以令你好似忘記咗依家現實發生嘅事，然後喺一個思想世界度好自由自在地去飛翔。」
「所以，我之前有個老師就話，呢幾年世界好動盪啦，但佢唯一最搵到佢內心平靜嘅時間就係去教書，同佢啲學生好純粹咁去探索哲學。嗰個時候佢好似忘記咗外面發生緊任何嘢，佢覺得個人好舒服。我覺得哲學係有一種令人抽離嘅能力。而正係咁，反而就係好多時候俾人話『離地』，但『離地』喺呢個位正是發揮到佢嘅作用。」
由哲普團體再到哲學本身，白水一部份的人生價值都建構在「哲學」之上。在哲學、理性和思考以外，白水又有著怎樣的人生態度？
｜創造力量同幽默會嚇你一跳？
如果你能為末世留一本書，你會選擇哪一本著作？
白水選擇了古希臘劇作家阿里斯托芬的喜劇劇作《利西翠妲》。
故事以雅典與斯巴達長年累月的戰爭為背景，講述當時一群女性為求阻止男性繼續沉醉於戰爭，不惜以拒絕房事要脅，與男人談判，最後讓男人屈服。
「你就咁聽已經覺得條橋好笑啦！因為當時（古希臘）都係一個父權社會，呢個play（劇目）就搵咗啲女性做主角，甚至係一班足智多謀，好有趣嘅一班人……以往喺古希臘就係一個好講榮耀嘅社會，俾人打咗就要復仇，要好剛強，所有嘢好似好fix（固定）……但原來我地可以有第三條路、第四條路、第五條路。
我地需要嘅就係一個新嘅方式去睇個世界。」
白水對這本劇作進行了更多描述和介紹，有興趣的讀者可以瀏覽《分號》Instagram昨天發佈的影片。歸納白水的說話，他認為我們在末世需要保留兩種特質：創意和幽默。
就創意而言，白水認為有些難以抵擋的末日例如天災固然避無可避，但人生有時候都會有感無路可走，彷彿走到自己的末日，這時候更多的創意可能可以讓我們找到一線生機。
「同《利西翠妲》故事一樣，喺哥倫比亞曾經都有過一次sex strike（罷性運動），原因係因為當年黑幫毒販仇殺好嚴重，每日都太多人死，於是啲毒販嘅女伴就搞左個叫Cross Leg Movement嘅Sex Strike，如果唔停止打打殺殺就唔同佢地搞野，然後最後成功左。其實你可以諗下會唔會係因為你本身用嗰個框架去睇個世界，去睇成功與失敗，有某一個既定嘅定義，所以導致到你覺得而家冇希望，聽日會係末日。
但會唔會我哋轉一個方式，如果我哋比較有創意嘅話呢， 聽日可以唔係末日呢？」
就幽默而言，白水認為幽默可以改變我們對末日的態度，即使無法改變外在既定會發生的災難，仍可以樂在其中。
「因為面對住可能真係一個好差好差嘅環境，你可以選擇喊住過，你都可以選擇笑住過，同一個反應但係唔同嘅情緒，笑住過你係比較鬆容啲，你係比較自信啲，你係比較可以面對到呢件事，令你繼續有力量撐落去。所以好多時你見到，可能有啲面對住絕症嘅病人，有啲面對住好嚴重人生crisis（災難）嘅人，當佢能夠仲可以自嘲嘅時候，其實佢係更加有韌性，更加有活力……我地好多時視呢個係一個短處，唔好嘅地方，但如果你可以攞呢樣野嚟講笑，其實證明你有能力。」
問：這種幽默感和阿Q精神般的自欺欺人有何分別？
「阿Q精神係直頭Twist（扭曲）咗件事嘅Fact（事實），明明係受緊苦但呃自己唔係；幽默感只係改變咗你睇一件事實嘅態度，並唔一樣。」
問：那麼幽默感又和現時十分流行的「地獄memes」同出一轍嗎？
「我覺得自嘲同笑其他人係唔同嘅。如果你對其他人講『地獄笑話』，你就係victimise（使人受害）緊人地，你喺人地嘅傷口度灑鹽。仲要好多時你笑，你係抽刀向弱者……我地會笑啲身體有障礙嘅人，笑啲不幸嘅人，係因為佢哋係弱者，你唔走去笑啲有錢人？
但你笑自己唔同。你自己就係嗰個弱者，自己就係嗰個victim，自己睇自己係一場玩笑，咁樣係無問題。」
問：但若然自嘲也會傷害到和你一同受害的人呢？例如作為一名亞洲人，若然我公然將雙手拉扯眼角形成一條線，自嘲眼睛細小，卻傷害了某些深受歧視困擾的亞洲人，那又如何是好？
「我覺得係要睇你笑乜。如果你係一個白人，你走去我面前係咁講Jackie Chan Jackie Chan，咁佢係笑緊你啦；如果你作為亞洲人一樣係取笑自己眼細，咁效果其實一樣；但如果你係笑緊啲人竟然咁戇鳩笑我眼細，係後設一步㗎窩，係唔同㗎窩……呢吓其實係好難拿捏，所以有啲人話自嘲其實唔係『笑自己』，而係『笑緊人地笑自己』。」
白水預告，好青年荼毒室在不久的將來將會推出一集《哲學係咁傾》討論有關幽默的道德界線，有興趣了解更多的讀者請關注好青年荼毒室的YouTube Channel，成為室友的一份子！
問：好青年荼毒室邊個最搞笑？
「四哥最搞笑，唔係佢講啲嘢好笑，係佢個人好笑。唔係個個好似佢咁㗎，佢好真心咁講一啲一般人聽到都會覺得鳩嘅嘢，而佢唔係特登搞笑。呢個位最好笑。」
｜結語：何時才是好青年荼毒室的末日？
末日未臨，路還是要繼續走。筆者有位朋友曾與荼毒室在Threads上爭執，至今仍意難平。訪問當天筆者特意替他問問荼毒室何時會解散，豈料白水卻回應：「其實我覺得我地隨時都可以執。如果我有一個責任，我對你唔住嘅，咁我唔執得啦，但我無啊嘛！我無話一定要做㗎嘛！做哲學普及純粹係我興趣，成日都有好多人話我地執咗仲好啦，我自己覺得未嘗不可。」
一個團體，有多少過到十年大限？更莫講五年、三年、一年…….對他而言，荼毒室有今日的成績，早已經超額完成。他們沒有欠任何人甚麼，再大的公關災難都經歷過，今日也不再是當日那個奮不顧身的少年，選擇更淡然地看待未來。哪怕荼毒室倒閉，這也不會成為白水的末日。
白水笑言，其實他們並不特別，只是比起其他哲學團體，他們更搞笑罷了。
願他們的幽默哲學，可以陪伴香港人捱過最難捱的末世。
分號 INTERLUDE HK 
發佈留言