《試玩毛》
應該係香港YouTube史上最大型綜藝節目系列，主題由魷魚遊戲到蝙蝠俠再到今際之國應有盡有，不能盡錄。參與拍攝嘅藝人亦星光熠熠，除咗有試當真成員，更有唔小知名KOL甚至藝人亦有曾經參與，絕對係香港YouTube界一大創舉。
Mockumentary 偽紀錄片
可以稱得上係試當真打響頭炮嘅系列，以「偽紀錄片」拍攝手法紀錄channel唔同階段嘅里程碑，製作質素甚高，笑點滿滿，係筆者一開始會愛上試當真嘅最大原因。
《口試王》
由於DSE中文已經取消咗卷四口試，試當真就將呢個老師制度搬落channel，更曾邀請著名補習名師YY Lam為參與者評分，探討議題由較為認真的「香港是個暢所欲言的地方」橫跨至較為輕鬆的「貓定狗更好」，將中文卷四的精神傳承下去。
海外會見粉絲
為報答海外粉絲的熱愛，試當真曾到訪英國、加拿大、冰島等地，並與粉絲們舉辦見面會。筆者重點推介英國的「重砲豪」系列，創意十足同時又能推廣香港足球，並藉此探討「移民潮」議題。
《試音片》
承襲Cap TV 傳統，試當真亦有「惡搞」不同的影視作品，為當中的角色重新配音。其中不少題材皆為諷刺社會種種現象，除了惹人發笑之餘亦引人深思。
《試睇電影會》
試當真一直不遺餘力地推廣好電影，此系列就採取較為輕鬆幽默的手法介紹不同的影視作品，亦有趁機推廣港產片佳作。其後亦有推出類似系列《有讚無彈電影會》，繼續致力將好作品推介給觀眾。
《認真嚴肅學術討論會》
此系列作品貴精不貴多，雖然數量較小，但每條都睇到筆者sldpk，尤其是《老派約會之必要 Remix》的歌詞研討會，成功令193「暢所欲言」，未睇過嘅朋友一定要睇！
《校花校草》
為培育更多潛力新人，試當真復辦已多年未有人舉辦的「校花校草」選舉，在一系列活動後由觀眾和老闆們票選出勝出者。大部份勝出者如今已經成為試當真骨幹成員。希望校花校草們即使在試當真停辦後仍然能闖出屬於自己的一片天！
《一週年現場》
講到試當真成軍以來最具象徵意義嘅一場活動，唔能夠唔提及《一週年現場》。呢場喺九展舉行show，唔單止係一個簡單嘅fan meeting，而係一場將YouTube內容搬上現場舞台、結合音樂、劇場、互動橋段嘅多媒體演出。
《試映劇場》
承CapTV作風，試當真一直創作各類短劇，既係實驗場，亦係木人巷，為唔少演員提供試煉演技嘅機會。系列之中有唔少作品緊貼潮流、時局，以潮語、網絡文化作藍本，例如《咁大件事無人講》等，成功創造出香港流行用語。試映劇場以低成本的創作及道具，如用泰式辣醬代替血漿，呈現出另一種僅屬於試當真的幽默感和玩味。同時，試當真亦有不少劇本緊貼時事的佳作，例如《再見豬豬》，全片僅6分鐘，但已貼地道出時下香港人「忘記與放下」的議題。
結語
隨住試當真宣布將於2025年10月26日停止營運，大家無疑會感到不捨。作為香港YouTube界一個不容忽視嘅創作團隊，試當真一直以其獨特嘅幽默感、創新思維同貼地題材，俘虜住無數觀眾嘅心。無論係輕鬆娛樂嘅創作，抑或更深層次嘅社會議題，試當真都一樣能夠駕馭。佢哋唔單止係一個娛樂平台，更係香港嘅文化現象，為我地年輕一代帶來無數值得回味嘅回憶。
感謝試當真每一位創作成員、幕前幕後嘅人員，為我哋帶嚟咁多精彩作品。雖然即將停播，但希望呢半年嘅時間，試當真可以繼續加油，無論係出新片、舉辦活動抑或係整理過去嘅經典作品，都希望大家可以再一次綻放光芒，試下認真，認真試下。
多謝！
分號 INTERLUDE HK 
發佈留言